Janitha van Reenen-Coetzee verskyn vanoggend weer in die Vanderbijlpark-landdroshof in verband met ’n beweerde R9.9m-bedrogspul oor die onwettige heraansluiting van elektrisiteit by die Emfuleni Plaaslike Munisipaliteit.

Volgens Vaalweekblad is sy op 3 September buite die hof in hegtenis geneem en op 18 September op borgtog van R20 000 vrygelaat.

Van Reenen-Coetzee staan tereg op aanklagte van diefstal, bedrog, geldwassery en peuter met noodsaaklike infrastruktuur. Sy word daarvan beskuldig dat sy na bewering aan die hoof van ’n onwettige elektrisiteitshersaansluitingsindikaat staan.

Sy het voorheen saam met sewe medebeskuldigdes in dieselfde hof verskyn. Sy staan ook in ’n afsonderlike saak tereg oor ’n beweerde R16m-spookvloot-skandaal.

Vaalweekblad het vroeër berig dat Van Reenen-Coetzee teregstaan op ’n aanklag van bedrog nadat sy na bewering inwoners mislei het deur voor te gee dat sy as ’n onafhanklike agent afslag op uitstaande munisipale rekeninge kon bekom.

Volgens die NVG het slagoffers geld aan haar betaal sodat sy die afslagbetalings namens hulle aan die munisipaliteit kon maak. Die geld is egter na bewering nooit aan die munisipaliteit oorbetaal nie.

Daar word verder beweer dat Van Reenen-Coetzee ook eise namens die slagoffers by die munisipaliteit ingedien het, waarna die munisipaliteit sowat R424 000 aan haar uitbetaal het. Die geld is glo nooit aan die begunstigdes vir wie dit bedoel was, oorbetaal nie.

Die beweerde bedrog het aan die lig gekom nadat die destydse hoof finansiële beampte van die Emfuleni Plaaslike Munisipaliteit, wyle Martha Mani Rantsofu, verdagte eise ter waarde van ongeveer R424 000 opgemerk en die saak aangemeld het.

Ná ’n interne ondersoek is die saak aan die SAPD vir verdere ondersoek oorhandig.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.