Die Vaaldriehoek is weer geskok nadat Francois Kruger (17), ‘n kranige rugbyspeler van die  Hoërskool Transvalia, gister op sy skool se tuisveld sy nek in ‘n derdespan-kragmeting teen Hoërskool Nelspruit gebreek het.

Kruger se nekbesering volg drie maande nadat Vilano Saunders, ‘n tweedejaars onderwysstudent aan die Noordwes-Universiteit Vaal, gesterf het nadat hy ook sy nek in ‘n rugbywedstryd gebreek het.

Kruger het intussen ‘n suksesvolle noodoperasie by Cormed Hospitaal ondergaan. “Die operasie het goed gegaan. Hy sal more uit ICU (hoësorgeeneheid) na ‘n gewone saal oorgeplaas word. Ons het soveel mense om voor dankie te sê.

“Ons wil vir Transvalia, die hoof Johann Venske sy broer Herman en die beheerliggaam dankie sê vir die finansiële bystand wat ons gehelp het met die operasie. Asook vir die dame by Cormed wat vinnig reëlings getref het, as dit nie vir haar was nie sou Francois dit nie gemaak het nie. Hy was besig om verlam te raak,” het Carel Kruger, Francois se pa gesê.

Sy ma Liana het hierdie roerende plasing op Facebook gemaak:

“Franna, 02/08/2025, is ʼn dag wat ek nooit ooit weer wil beleef nie. Ek dink nie die woorde ‘Julle kind se nek is gebreek’ is al ʼn realiteit nie. Dit voel nog so onwerklik… mens verwag dit nie. Rugby is vir ons ʼn liefde, ʼn passie, nie ʼn dag van hel nie… En dit raak nie beter nie. Hoe verwerk mens die woorde ‘jou kind is besig om verlam te raak, ons kan hom dalk nie red nie’? Wat doen mens???

“En dan besef mens hoeveel spesiale plekke jy in almal se harte het. Hoeveel mense vir jou omgee, vir jou lief is. Vir jou bid vir volkome herstel.

“Aan die einde van n baie lang uitputtende dag, kan ek net dankbaar wees. Die Here het jou vandag beskerm en sy favourite gemaak. Hy het vir JOU gekies om fine te wees.

“Hoe amazing is die krag van gebed! My rugby mamma hart is seer, jy het my genot verskaf met jou mooi talent! Jy het jou laaste game besonders goed gespeel, so asof jy geweet het… Maar my mamma hart loop oor van dankbaarheid dat jy fine sal wees. Dat jy more sal kan loop, dat jy more nog sal lewe.”

Geen verdere inligting was teen die tyd van publikasie beskikbaar nie.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.