Die nuus dat ’n bykans drie meter lange krokodil in die Vaalrivier rondswem, het soos ’n veldbrand versprei en belangstelling van oor provinsiale grense heen gelok, berig Vaalweekblad.

’n Gespesialiseerde eenheid van die Gautengse Departement van Landbou en Landelike Ontwikkeling, wat verantwoordelik is vir wildpermitte, stropery en probleemdiere,het saam met die SAPD se Watervleuel Dinsdagoggend (11 Augustus) in die area vergader. Hulle het ’n gesamentlike oplossing vir die krokodil-probleem probeer vind.

Volgens die spesialiste is dit uiters moeilik om ’n krokodil in die rivier, wat oor sowat 1 200 km strek, op te spoor en te vang.

Vir die spesialiste was dit dus goeie nuus toe ’n gesoute krokodilvanger, Charles van der Merwe van Africa Crocodiles in Pongola, ingestem het om te help.

“Die gewenste uitkoms was nog altyd om die krokodil, indien moontlik, veilig te vang en te verskuif. Die feit dat Africa Crocodiles bereid is om ons te help, is beslis goeie nuus,” sê Rosemary Anderson, een van die mense wat ’n riviereiendom besit.  

Niemand kan met sekerheid sê hoe lank die krokodil, wat vermoedelik sowat 15 jaar oud is, reeds in die Vaal-area woon nie.

Krokodil woon moontlik al jare in Vaalrivier

Die krokodil het moontlik al jare gelede die area as sy habitat gekies, maar het daarin geslaag om onopgemerk te bly.

Ander glo weer dat die krokodil sy weg na die rivier gevind het na die vloede van die afgelope paar jaar.

Van der Merwe is voornemens om twee krokodilvanghokke in die rivier te plaas in ’n poging om die krokodil veilig te vang. Daarna sal toepaslike reëlings vir sy hertoewysing of verskuiwing getref kan word.

Hy het aangebied om sy kundigheid en tyd gratis beskikbaar te stel. Hy is tans besig om finale reëlings te tref en as alles volgens plan verloop, sal hy Maandag (17 Augustus) reeds in die Vaal wees.

“Die Vaalrivier-gemeenskap het saamgestaan sedert hulle gehoor het dat Charles sy hulp aangebied het. Verskeie inwoners en ondernemings het dadelik aangebied om bote, verblyf, etes, fisiese hulp en enigiets anders wat nodig mag wees te verskaf. Hulle is ook bereid om hom en die owerhede met die vangoperasie te help,” sê Anderson.

Waarnemings van die krokodil

Stephen Smith, ’n inwoner, het die krokodil naby Marlbank in die Vaalrivier gewaar. Hy het daarin geslaag om ’n foto te neem.

Die krokodil is intussen ook deur verskeie inwoners in die Old Willow-omgewing aan die Vrystaatse kant van die rivier opgemerk. Dit wil voorkom of die besoeker in dié omgewing bly.

Smalbekkrokodil

Volgens krokodilkenners kan dit moontlik ’n Wes-Afrikaanse smalbekkrokodil wees. Die spesie bestaan uit skugter, mediumgrootte roofdiere wat hoofsaaklik vis vreet en selde mense aanval.

Aanvalle is uiters skaars omdat hul smalbekke gevorm is om waterprooi te vang eerder as groter soogdiere.

Volwasse mannetjies kan tussen 3 en 4 m lank wees. Dit is uitsonderlik as smalbek-krokodilmannetjies sowat 4.5 m lank word. Hulle weeg gewoonlik tussen 125 en 325 kg.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.