Twee verdagtes is gister deur die Valke se Eenheid vir Ernstige Korrupsieondersoeke gearresteer vir beweerde bedrog van meer as R87 000 by die Noordwes Departement van Openbare Werke en Paaie.

Malane Abraham Letsapa (45) en Moreotsile Israel Olifant (50) het vandag ’n dringende borgtogaansoek na die hooggeregshof gebring. Hulle is op R2000 borgtog vrygelaat en sal Maandag in die Taung-landdroshof op klagte van bedrog verskyn.

Letsapa, wat die Distrikskoördineerder van die Uitgebreide Openbare Werke-program was (EPWP), en Olifant, die voormalige PR-raadslid van die Dr Ruth Mompati-distriksmunisipaliteit,,  is onderskeidelik in Vryburg en Taung gearresteer, het luitenant-kolonel Tinyiko Mathebula bevestig.

Volgens verslae het die Dr Ruth Mompati-distriksmunisipaliteit in Desember 2020 die implementering van die Presidensiële Stimulusprojek (PSP) onder die Departement van Openbare Werke en Paaie se EPWP goedgekeur. Die projek was glo bedoel om in die Matsheng- en Tlapeng-dorpe in die Groter Taung-munisipaliteit geïmplementeer te word, en het die snoei van bome en gras langs die hoofpad wat na en van die twee dorpe lei, ingesluit.

Daar word beweer dat Olifant die proses van die identifisering van begunstigdes gefasiliteer het, terwyl Letsapa die eise vir betaling van die begunstigdes vir ’n tydperk van drie maande verwerk het.

Volgens luitenant-kolonel Mathebula het die ondersoek aan die lig gebring dat geen dienste gelewer is nie, wat daartoe gelei het dat die Departement ’n verlies van meer as R87 000 gely het.