Die AfriForum-tak in Viljoenskroon het op 8 Junie watertoetse gedoen om vas te stel of daar cholera teenwoordig is in die boorgate, munisipale water en die bewaararea. Daar is op drie plekke monsters geneem om by ’n geakkrediteerde laboratorium getoets te word, het die burgerregte organisasie AfriForum vandag in ‘n verklaring gese.

Die monsters wat geneem is was by ’n boorgat in die dorp, ’n kraan met munisipale water by die Salmon Senekal Hoёrskool en by die bewaararea. Die uitslae van die toetse is op 13 Junie aan die tak deurgegee.

AfriForum se daar is op geen van hierdie plekke tekens van cholera gevind  nie en het die boorgatwater ook nie E.coli in nie, is bevind. Daar is egter by die ander twee plekke positiewe tekens van E.coli en fekale kolivorme gevind.  AfriForum se die uitslag van die toetse beteken dat daar tekens van riool in die munisipale water en by die bewaararea is, wat ander siektes as cholera kan veroorsaak.

“Ons maan inwoners van Viljoenskroon om nie enige water te gebruik voordat die water eers gekook is nie. Inwoners moet ook nie in die water swem nie,” sê Alta Pretorius, AfriForum se distrikskoördineerder vir die Mooirivier.

Pretorius se die Viljoenskroon-tak het al met die plaaslike munisipaliteit gepraat oor die gereelde rioolstortings in Viljoenskroon en Rammulotsi. Daar is egter nog nie ’n volhoubare oplossing op die tafel nie se sy.

Die rioolstorting is by die Departement van Water en Sanitasie (DWS) aangemeld, en is die uitslae van die watertoetse reeds aan DWS deurgegee met die versoek dat daar dringend opgetree moet word.

“Die swak bestuur en onbevoegdheid van munisipaliteite is nou vinnig besig om hulle in te haal. Dit is egter hartverskeurend dat ons waterbronne, waarsonder nie mens óf dier kan klaarkom nie, in die proses beskadig word. Ons sal opvolg toetse doen en die gemeenskap op hoogte hou van enige veranderinge al dan nie,” sluit Pretorius af.