Vir die volgende twee dae (28 en 29 Oktober) sal Parys se spog gholfbane ‘n bedrywigheid wees met ‘n rekord van 124 vroue wat deelneem aan vanjaar se tweejaarlikse Parys Ladies Classic-gholftoernooi. Dit is die meeste inskrywings nog, en is dit die sewende keer dat die toernooi in Parys op die Parys Golf & Country Estate en Vaal de Grace gholfbane gespeel word.

Inskrywings kom van oral oor die Vrystaat, Noordwes, die Vaaldriehoek , Gauteng, Pretoria, die Oos-Rand en selfs uit die Kaap.

Die kompetisie is in vierbal span-verband, asook individueel.

Vanjaar se tema is Colours of Joy en wat ‘n vreugde was dit nie om die dames kleurvol getooi te sien afslaan nie. Elke span se naam word  gekies om by hul tema te pas. Van die Rainbow Chicks tot die Periwinkle Pixies, die Blue Berries en die Tee Time Birdies. Almal is hier!

Saam met strawwe kompetisie, is daar ruim tyd vir nuwe vriendskappe en heerlike kuiers, vertel Elizabeth Fourie.

Die toernooi het aanvanklik  met 32 spelers begin en oor die jare gegroei met Parys wat ‘n gewilde gholfbestemming is.

Nie net is die geesdrif van die dames wat vanoggend afgeslaan het aansteeklik nie, maar is hierdie ‘n uitmuntende geleentheid om Parys se gasvryheid te bemark en ‘n groot ekonomiese inspuiting vir die dorp wat die dames hier met ope arms verwelkom het vir hul twee dae lange verblyf in Parys.