Talle huise oorstroom ná swaar reën
Die koue en nat weerstoestande sal na verwagting tot minstens Maandag voortduur.
Swaar reën het veroorsaak dat talle huise in die Kwakwatsi-woonbuurt by Koppies, en in die Phiritona-woonbuurt by Heilbron oorstroom het. In Saundersville alleen is berigte ontvang van 16 huise wat oorstroom het.
Die Ngwathe Plaaslike Munisipaliteit het vroeër vanmiddag gewaarsku dat die brug op die S44 tussen Heilbron en Phiritona oorstroom is.
In Parys is tussen Dinsdagoggend en Sondagoggend 58mm reën gemeet, terwyl in die Vredefort-distrik tot 70mm reën gemeet is.
Koppies-dam was teen vanoggend 08:00 reeds 98,9% vol.
Vaaldam het vanoggend om 08:00 uitvloei verhoog na 60 kubieke meter per sekonde.
Die uiterste weerstoestande wat die naweek gesien is, is die gevolg van ’n afgesnyde laedrukstelsel, wat van Saterdag tot Maandag (15–17 November) weerstoestande sal beïnvloed. Die tipe weerstelsel word dikwels geassosieer met wydverspreide reën en swaar donderstorms.
