‘n Fantasiewêreld gryp die verbeelding aan voor die huis van Christel Smith in Boomstraat. Hier naby die dorp se bekende hangbrug trek die witstinkhoutboom met sy kunstige, kleurvolle kabouterhuisies jou aandag – van die fyn deurhandvatseltjies tot die wit klippaadjies en vensterbanke met mosaïekversierde teëltjies. Gereeld kom klop ‘n kinderhandjie aan die kabouterhuisdeurtjies of staan besoekers in verwondering en kyk na die kunswerk.

Christel het ses jaar gelede van Kempton Park na Parys verhuis. Haar man, Paul, was die een wat altyd tuin gemaak het. ‘n Jaar na hul intrek in die dorp is Paul oorlede en het die tuinmaak vir Christel haar terapie geword.

Sy wou iets skep wat vir ander ook mooi sou wees

Sy het lank met die idee geloop. Toe verf sy ‘n stomp met die feetjietema, en daarna die boom met sy unieke stam voor haar huis. Sy wou iets skep wat ook vir ander mooi sou wees, vertel Christel. Sedertdien het die boom haar al soveel vreugde gegee.

Vroeër was daar feetjies en dwergies, vasgesement om die boom, en ook in die boom, maar net ‘n maand nadat Christel hulle by die boom geplaas het, het diewe dit weggedra. Daarna het sy onlangs ook klein ornamentele uiltjies in die boom geplaas wat ook twee weke gelede deur diewe weggedra is.

Maar die diefstal steel nie Christel of die vele wat stop by haar feetjieboom se vreugde nie. Gereeld word hier foto’s geneem. “Op ‘n dag het ‘n man hier met sy fiets gestop en gevra of ek aan feetjies glo,” vertel Christel. Kort daarna was hy terug met sy vrou en kinders om die mooi met hulle te deel.

Feetjies slaap in die dag

Wanneer die kinders vra waar die feetjies is, verduidelik Christel dat feetjies slaap in die dag. Christel se feetjieboom het sedert sy met die inisiatief begin het, ook van haar bure geïnspireer om haar voorbeeld te volg.

Haar buurvrou, Petro Bezuidenhout het daarna ook ‘n feetjieboom geverf, en het die karaktervolle vergroeisels aan ‘n boom voor Bezuidenhout se erf, beertjiegesigte gekry.

In 2024 moes Christel alles om haar boom oordoen as gevolg van kontrakteurs wat optiese veselkabel moes installeer, maar solank as wat ‘n mens kan droom, sal feetjies en kabouters hier ‘n huis hê by Boomstraat se bome.