Kort nadat ‘n tornado wat as ‘n EFo deur die Suid-Afrikaanse Weerdiens geklassifiseer is, verlede week net buite Heilbron getref het, is ‘n klein tornado Sondag laatmiddag ook in die distrik van die Vrystaatse dorp Dewetsdorp gerapporteer.
Geen skade is aangerig nie en was dit van korte duur.
Daar is verlede week gewaarsku teen donderstorms vir die Vrystaat en word nog reën vir die provinsie ook vir die week voorspel.
Benewens die Dewetsdorp en Heilbron tornado’s, is ‘n tornado naby Harrismith ook drie weke gelede gerapporteer.
Tornado’s in Suid-Afrika
Lehlohonolo Thobela, meteoroloog by die Suid-Afrikaanse Weerdiens het by navraag van Gazette gesê navorsing toon dat tipiese toestande wat bevorderlik is vir tornadiese en swaar konvektiewe aktiwiteit – naamlik vogtige, samevloeiende lug, laevlak-skuinsheid en onstabiele omgewings wat met koeler stelsels bots – dikwels in dele van Suid-Afrika voorkom. Thobela wys daarop dat historiese en kontemporêre ontledings toon dat baie van Suid-Afrika se tornado’s, en selfs ’n soort ‘tornadogordel’, in die Hoëveldstreke en oostelike provinsies voorkom, insluitend Gauteng, die Vrystaat, Mpumalanga en KZN.
Thobela het bygevoeg dat historiese gebeurtenisontledings ook ’n seisoenale spits vir tornado’s aandui gedurende die midsomer maande (November–Maart). “Belangrik om te onthou is dat tornado’s nie streng tot die somermaande beperk is nie. “Daar is gedokumenteerde voorvalle in die lente (September–Oktober) en laat somer.”
Thobela sê dit ondersteun die idee dat warm, vogtige omgewings met verkoelde stelsels as sneller ’n belangrike aanduiding is van tornado’s wat gedurende hierdie tyd van die jaar kan voorkom.
