Studente van die Noordwes-Universiteit se Potchefstroom-kampus wat Saterdag ‘n blikskud in Parys gehou het, het uitgereik na diegene in nood toe hulle ‘n gedeelte van dit wat hulle die dag ingesamel het, geskenk het aan die nie-winsgewende welsynsorganisasie, Vrystaat Versorging in Aksie (VVA) in Parys.

Die VVA sien om na die maatskaplike nood van baie mense, waaronder ook kinders. In 2024 moes die VVA meer as 30 kinders uit ouerhuise in die Parys-gemeenskap verwyder weens verwaarlosing en mishandeling. Die kinders se ouderdomme wissel van pasgebore tot 13 jaar oud.

Negentig persent van hierdie kinders kom uit huise waar daar dwelmverslawing is, en wat blootgestel was aan erge verwaarlosing en mishandeling.

‘n Huis van veiligheid is in 2024 bekom waar hierdie kinders kan bly totdat hulle na hul ouerhuise of familie kan terugkeer, of totdat hulle na ‘n jeugsorgsentrum oorgeplaas kan word.

Skenkings soos dié help om naas die maatskaplike werk wat VVA in die gemeenskap doen, ook die veiligheidshuis in te rig, en te kan voorsien in die behoeftes van die kinders wat hier geplaas sal word.