Die haglike toestand van die R719 tussen Wesselsbron en Bothaville, het boere in die distrik genoodsaak om self te begin herstelwerk doen aan die pad wat ‘n belangrike vervoerroete vir boere en verskaffers is.

Die pad dra jaarliks ook swaar verkeer met die Nampo Oesdag, een van die grootste landbouvertoonventers onder private besit in die suidelike halfrond,, wat van 13 tot 16 Mei  op die Oesdagplaas buite Bothaville gehou word.

Boere sê met sonneblom-oeste wat van die lande af moet kom, is die pad bykans onrybaar vir vragmotors, en moet daar dringend plan gemaak word. Nie net veroorsaak die swak toestand van die pad probleme met aflewerings nie, maar lei voertuigeienaars groot skade aan motors en vragmotors wat daagliks hier moet ry. Dit afgesien van die gevaar wat dit inhou veral saans as sig swak is.

Die Demokratiese Alliansie in die Nala-munisipaliteit waarbinne Bothaville val, het n dringende skrywe aan die Vrystaatse Provinsiale Regering oor die R719 gerig, en sê DA-raadslid Thinus Barnard, dringende hulp is nodig om die boere in dié distrik te ondersteun.

Barnard sê boere is alreeds onder druk met ongunstige boerdery omstandighede en kan nie verdere verliese bekostig nie.