’n 28-jarige vrou is na bewering Vrydagoggend omstreeks 02:00 op die Bult verkrag.
“Ek wil sien hoe jy ly,” het haar verkragter glo aan haar gesê voordat hy haar verkrag het.
Volgens ao. Mpho Manyoba, polisiewoordvoerder, was sy saam met vriende by ’n kuierplek.
“Volgens haar verklaring het sy ’n uitval met haar kêrel gehad, waarna sy buite gaan sit het,” vertel Manyoba.
’n Karwag het haar glo genader om met haar te praat, maar sy het vir hom gesê om haar uit te los.
Daarna het ’n jonger man haar genader. Voor sy vir hom kon sê om haar uit te los, het hy glo vir haar gesê “ek wil sien hoe jy ly”. Volgens Manyoba het die man haar gegryp en teen ’n muur in ’n stegie vasgedruk.
Die karwag van vroeër het by die man aangesluit en haar vasgedruk terwyl die ander man haar verkrag het.
“Dit is wat ons met julle wit meisies gaan doen,” het die man glo vir die vrou gesê terwyl hy haar verkrag het. Hy het daarna vir die karwag gewys dat dit nou sy beurt is. Terwyl hy die vrou verkrag het, het sy om hulp geskree, waarna ’n voertuig gestop het. Die verdagtes het weggehardloop. Die vrou is na Potchefstroom Hospitaal geneem, waarna sy ’n klag van verkragting by die polisie aangemeld het.
Niemand is nog in hegtenis geneem nie.