’n Graad agt-leerder van ’n skool in Mohadin is Dinsdagmiddag, 13 Junie omstreeks 13:00 voor sy skool met ’n mes aangeval.
Volgens die seun het hy ’n bakleiery tussen ’n ouer seun en ’n vriend van hom probeer keer. Hy het daarin geslaag om sy vriend van die ander seun af weg te kry.
“Ons het huis toe geloop, maar hy het ons agtervolg,” vertel die seun.
Kort daarna het die ander seun, wat 17 jaar oud is, die 13-jarige seun aangeval. Volgens die seun se ma het hy hom vier keer in die rug gesteek voor hy gevlug het.
Die rusie tussen die seuns spruit glo uit ’n misverstand oor ’n selfoon. “Eers het ek niks gevoel nie, maar ‘n rukkie later begin ek toe moeg word. Dit is toe ons in ’n oom se kar geklim het en kliniek toe is,” vertel die seun. Sy toestand is by die kliniek gestabiliseer, waarna hy na Potchefstroom Hospitaal geneem is vir verdere behandeling. Hy is Sondag, 18 Junie ontslaan. “Ek wil reël dat hy berading kry, hy is deur erge trauma. Ek kan net vir die Here dankie sê dat my kind nog leef,” sê sy ma.
Die polisie ondersoek ’n saak van poging tot moord.

“Die 17-jarige seun is uit die skool geskors,” het die ma gesê.