’n 19-jarige studentemeisie is Sondagoggend deur ’n man in haar meenthuis in Dwarsstraat aangeval.
Volgens kapt. Mvula Chaka, polisiewoordvoerder, het twee verdagtes ’n ruit gebreek om toegang tot die woonstel te kry.
“Sy was in die slaapkamer toe hulle ingekom het,” vertel hy.
Volgens hom het een van die verdagtes bo-op die meisie gaan sit. Terwyl hy met een hand haar mond toe gehou het het hy met die ander hand haar klere probeer uittrek.
“Die verdagte het ’n stuk gebreekte glas gebruik om die meisie se klere te probeer afsny,” het hy gesê.
Sy het aanhou terug baklei tot sy uit die verdagte se greep kon kom waarna sy begin skree het.
“Die verdagtes het toe gevlug. Dit blyk dat daar gelukkig niks gesteel is nie,” het Chaka gesê.
Sy is na die voorval na haar bure toe wat Mooirivier Beskerming en die polisie geskakel het.
Die meisie is deur ER24 na Potchefstroom Mediclinic geneem om vir snywonde wat sy aan haar gesig, been en hand opgedoen het.
Diana King, woordvoerder van Mediclinic, het bevestig dat sy behandel is en later ontslaan is.
Die student het verkies om nie met die Herald oor die voorval te praat nie.
Volgens Chaka word ’n saak van huisroof ondersoek. Niemand is nog in hegtenis geneem nie.