Tien veldbrande oor die laaste twee weke het ongeveer R20 miljoen se skade aangerig toe sowat 16 000 hektaar verwoes is.
So sê Kobus Roux, voorsitter van die Potchefstroom Brandbeskermingsvereniging (BBV).
Die brandweer, Working on Fire en BBV het verlede week Woensdag (16 Augustus) hulle hande vol gehad met vyf brande wat in die area in en om Potchefstroom gewoed het. Woensdag was daar gedurende die dag ’n sterk rookreuk in die stad as gevolg van die brande.
Volgens Roux het die brande naby die Ventersdorppad, Carletonvillepad, Viljoenskroonpad asook Lindiquesdrift voorgekom.
Dinsdag (22 Augustus) het die brande weer opgevlam naby Potchefstroom, Fochville en Carletonville.
Volgens Roux was daar brande op 12 boere se plase, waterwese en ’n gedeelte van Boskop Natuurreservaat.
Skade was meerendeels aan weiding. Niemand is dood of beseer nie.
Die sterk wind en droogte maak die area baie meer vatbaar vir brande.