Slegs sewe diere is tydens die Potchefstroom Animal Welfare Society (PAWS) se jaarlike patrollies op Oujaarsaand gevind.

Die idee agter dié inisiatief is om diere wat skrik vir vuurwerke en in die straat eindig veilig te hou totdat die diere se eienaars hulle kan opeis.

Volgens Herman van der Sluis, bestuurder van Paws, was daar vanjaar  ‘n skerp daling in die hoeveelheid diere wat op straat, tydens Oujaarsaand, gevind is.

“In vergelyking met verlede jaar se 23 het ons slegs sewe diere in die straat gevind. Ek dink die mense word meer bewus van hoe om diere tydens dié tydperk veilig te hou. Ons het ook orals kennisgewings op gesit wat vir mense verskeie wenke oor hulle diere se veiligheid gegee het,” het hy gesê.

In samewerking met ‘n span van ongeveer 40 vrywilligers kon die span van Paws ‘n baie groot area dek. In sommige gevalle is die diere dadelik aan die eienaars terug besorg.

Slegs drie van die diere is nog nie deur eienaars opgeëis nie