ʼn Onderwyser van die Gr.R klas by die Laerskool Schweizer-Reneke waar dit blyk asof swart en wit kinders in die klas volgens ras geskei is, is vandag (10 Januarie) geskors hangende ʼn ondersoek na die omstrede foto.

Sello Lehari, LUR vir Onderwys in Noordwes, het Donderdag die skool besoek om met die hoof te vergader.

Volgens Lehari is daar tydens dié vergadering aan hom verduidelik dat die vier swart kinders eenkant gesit het omdat hulle nuwe inskrywings is wat nog nie Afrikaans of Engels kon praat nie.

Lehari het aan ʼn groep betogers op die skoolgrond gesê dat die verskoning nie aanvaar word nie.

Verskeie ouers het hulle kinders by die skool kom haal nadat ongeveer 150 betogers die perseel betree het. Volgens ʼn ooggetuie het betogers teen 10:30 vreedsaam betoog. Ander foto’s waar die kinders van verskillende rasse bymekaar sit is na die tyd op sosiale media ook gedeel. Baie ontevredenes glo egter dat dit gedoen is om die skade wat die reaksie op die ander foto gedoen het te bekamp.