‘n Man (43) is gisteroggend (6 Oktober) omstreeks 03:15 tydens ‘n huisbraak twee keer in die been geskiet.
Volgens kapt. Mvula Chaka, polisiewoordvoerder, het die man se 74-jarige ma die oggend uit hul huis binne ‘n veiligheidskompleks in Bachstraat gegaan om asem te skep.
Dit is toe dat sy die drie gewapende mans met balaklawas oor hul gesigte in die erf teëkom.
Die verdagtes het haar oorval en sy het na haar seun, wat binne die huis was, om hulp geroep.
Toe die seun sy ma probeer help het, het die verdagtes hom twee keer in sy been geskiet.
Die verdagtes het die huis geplunder en met onder andere selfone, ‘n televisie en die man se voertuig gevlug.
Nog niemand is in verband met die voorval in hegtenis geneem nie. Die polisie ondersoek ‘n saak van huisroof.
