Potchefstromers kan weer in munisipale swembad baljaar
Die swembad is amptelik op Donderdag, 24 November oopgemaak.
Die Potchefstroomse munisipale swembad in Beyers Naudélaan is vir die eerste keer in amper drie jaar weer vir die publiek oop.
Die swembad is amptelik op Donderdag, 24 November oopgemaak met die waarnemende direkteur van parke, Thomas Muswede, en DA wyksraadslid, Madra de Bruin wat die openingsgeleentheid bygewoon het.
Potchefstromers kan nou weer baljaar en afkoel in die somermaande en Desembervakansie wat om die draai is.
Die munisipaliteit het verlede week verduidelik dat daar beplan word om al die munisipale swembaddens teen 1 Desember operasioneel te hê.
Volgens die DA in die JB Marks Munisipaliteit is die heropening van die Potchefstroomse openbare swembad ‘n stap in die regte rigting, veral aangesien hierdie openbare fasiliteit in ‘n bedenklike toestand was.
“Die DA het verskeie toesighoudende inspeksies gedoen net om vas te stel dat instandhouding ook opgeskort is, wat tot krake, lekkasies en wanfunksionele pompe gelei het. Die DA het in samewerking met die Potchefstroom Onderwaterhokkieklub saamgewerk om toe te sien dat die munisipaliteit die swembad dreineer, die krake herstel, die swembad hervul, foutiewe swembadpompe vervang en die ablusiegeriewe betyds vir die Desembervakansie diens,” het wyksraadslid, Madra de Bruin in ‘n persverklaring genoem.
Lewensredders is ook weer amptelik aangestel is om die veiligheid van swemmers te verseker.
Die swembad is oop vir somerswempret van Dinsdae tot Sondae vanaf 10:00 tot 18:00.
