Kommer oor die moontlike verkoop van gesteelde selfone en skootrekenaars by tweedehandse winkels in Potchefstroom het vrae laat ontstaan oor die nakoming van wetgewing rondom tweedehandse goedere.

Dit kom te midde van ’n toenemende probleem met sakkerollery en bedrog in gebiede soos die Bult en ander gewilde studentegebiede, waar studente gereeld hul selfone en skootrekenaars verloor.

Die vraag wat nou ontstaan, is waarheen hierdie gesteelde items gaan nadat dit van hul eienaars ontneem is.

Die Bult en Wandellaan het verskeie tweedehandse winkels, wat die vraag laat ontstaan of alle ondernemings wat tweedehandse goedere koop en verkoop, aan die nodige wetlike vereistes voldoen.

Volgens Danie Strydom, eienaar van ’n tweedehandse goederewinkel, moet ’n onderneming wat tweedehandse goedere wil koop en verkoop, by die polisie registreer en ’n sertifikaat bekom. Die onderneming moet ook aandui watter tipe goedere gekoop en verkoop gaan word.

Strydom sê daar is verder streng vereistes wanneer ’n winkel ’n item van ’n persoon aankoop.

“Wanneer jy iets van iemand koop, moet jy ’n verkrygingsrekord hê. Dit sluit onder meer ’n verklaring, ’n afskrif van die persoon se identiteitsdokument en bewys van adres in,” sê hy.

Die item moet daarna vir sewe dae gehou word voordat dit weer verkoop mag word.

Volgens Strydom gebeur dit ook dat mense meubels of huishoudelike toestelle op krediet koop en dit daarna aan tweedehandse goederewinkels probeer verkoop om vinnig kontant in die hande te kry.

Hy waarsku dat winkeleienaars en kopers daarom uiters versigtig moet wees oor by wie hulle tweedehandse goedere aankoop.

“Jy moet seker wees van wie jy koop. As iets nie reg lyk of voel nie, is dit waarskynlik ook nie reg nie,” sê hy.

Strydom waarsku ook inwoners om versigtig te wees wanneer hulle tweedehandse goedere op Facebook Marketplace koop of verkoop, aangesien daar volgens hom talle bedrogspulgevalle op die platform voorkom.

Met diefstal en bedrog wat steeds ’n bekommernis onder studente is, bly die vraag belangrik, waarheen gaan gesteelde selfone en skootrekenaars nadat dit gesteel is, en word die nodige wetlike prosedures gevolg wanneer hierdie items weer verkoop word?

Studente word intussen aangeraai om waaksaam te wees met hul waardevolle besittings, veral in besige gebiede, en om verdagte transaksies of moontlike bedrog aan die toepaslike owerhede te rapporteer.