Meer as ‘n jaar later is daar steeds vrae rakende die ondersoek van Witrand Spesialishospitaal pasiënt Quinton du Plessis (40) se dood. Hy is op 12 Junie 2025 oorlede.

Witrand-hospitaal in Potchefstroom is toenemend in die spervuur te midde van ernstige bewerings van pasiëntemishandeling, verwaarlosing en moontlike nalatigheid wat met die dood van pasiënte verband hou. Verskeie families het reeds na vore getree met kommerwekkende bewerings oor die behandeling en versorging van hul geliefdes by die instelling. Die kwessie het landwyd aandag getrek en laat ernstige vrae ontstaan oor pasiëntveiligheid, verantwoordbaarheid en die gehalte van sorg wat aan van die mees kwesbare lede van die gemeenskap gebied word.

Quinton se familie wag steeds op antwoorde, hoewel die provinsiale Departement van gesondheid nou die bevindings van sy ondersoek bekend gemaak het. Volgens sy suster, Colette, is daar steeds nie geregtigheid nie.

Quinton, ’n langtermynpasiënt by Witrand, se dood het ernstige bewerings van moontlike mishandeling en seksuele aanranding by die hospitaal tot gevolg gehad. Die LUR van die Noordwes Departement van Gesondheid, Sello Lehari, het in ‘n persverklaring genoem dat die departement se ondersoek egter nie bewerings van fisiese mishandeling toon nie, en dat die kneusplekke wat waargeneem is, toegeskryf word aan komplikasies weens die pasiënt se mediese toestand. Die bewering van seksuele aanranding is steeds onbeslis weens die polisieondersoek wat nog hangend is. Die nadoodse ondersoekverslag was ook nog uitstaande toe die departement sy verslag gefinaliseer het.

Die Departement van Gesondheid se ondersoek het wel verskeie ernstige tekortkominge by die hospitaal uitgewys, onder meer personeeltekorte, swak kommunikasie, onvoldoende sekuriteit, gebrekkige instandhouding van toerusting en probleme met pasiëntesorg. Die departement het onderneem om verskeie verbeterings aan te bring en ’n spesiale Witrand-intervensietaakspan sal die implementering van aanbevelings oor ses maande monitor.

Onder die verbeteringe wat reeds aangebring is, is die installering van 26 nuwe lugversorgers, die vervanging van 41 gebreekte vensters en die herstel van beligtingsprobleme. Die hospitaal se wassery bly egter ’n uitdaging, met slegs drie van die agt masjiene wat tans werk.

“Ons doelwit is duidelik om pasiëntveiligheid te versterk, die gehalte van sorg te verbeter en te verseker dat gebruikers van geestesgesondheidsorg by Witrand met waardigheid, deernis en professionaliteit behandel word. Ons sal voortgaan om die implementering van die aanbevelings te monitor en die betrokke strukture verantwoordelik te hou vir vordering. Ons betuig ons medelye met die familie van wyle mnr. Quinton du Plessis. Hoewel ons nie die verlies van ‘n lewe ongedaan kan maak nie, kan ons verseker dat daar met erns en vasberadenheid opgetree word na aanleiding van die lesse wat uit hierdie aangeleentheid voortspruit,” het Lehari genoem.

Vir Colette is hierdie beloftes egter nie genoeg om die saak af te sluit nie. Sy sê sy sal nie ophou veg totdat sy antwoorde en geregtigheid vir haar broer se dood gekry het nie.

“Mense wil weet wanneer ek gaan opgee. Ek gaan nooit opgee nie. Ek sal nie ophou voordat ek geregtigheid vir my broer se dood gekry het nie. Ons sal aanhou totdat geregtigheid geskied.”