Alle aanduidings is daar dat die eens magtige Potchefstroom Dorp Rugbyklub, alom bekend as Potch Dorp, eersdaags weer ‘n faktor in die Luiperd rugbyligas gaan wees.

Geoordeel aan die sukses van verlede week se noenmaal, het  baie persone hande gevat en is die ywer beslis daar om ‘n sukses van die poging te maak.

Hierdie poging geniet meer openbare steun as vorige pogings. Bykans 400 mense het die geleentheid bygewoon, onder andere vorige presidente soos Jan Fourie, Piet Brand en Willie Victor, asook administrateurs soos Robert en Christine Thomas en oud-spelers soos Sakkie Raath, Piet Jordaan, Eugene Hare en talle ander.

Daar is luister aan die aand verleen met die teenwoordigheid van die Springbok legendes soos Stefan Terblanche, Ray Mordt, Warren Brosnihan, Krynauw Otto en Danie Gerber. Frank Redelinghuys, wat as voorsitter by dr. Jan Janse van Rensburg oorgeneem het, en sy komitee, verdien lof vir die poging en verdien ook steun van alle rugbyondersteuners in die stad. Albert Griessel is ook by dié funksie as Potch Dorp se Sportman van die Jaar aangewys terwyl Ruan Kruger as Junior Sportman bekroon is.