Dit is hierdie Vrydag 6 April D-dag vir die Luiperds se president, André May, wat die kans staan om in die warmste stoel in SA Rugby te sit.
May staan teen die huidige president, Mark Alexander, vir SARU presidentskap tydens die algemene raadsvergadering in Kaapstad.
Twaalf rugbyunies gaan die geleentheid hê om hul stemme dik te maak en te stem wie hulle as president wil hê.
Sedert May se beskikbaarheid vir SA Rugby se top pos bekend geword het dit al heelwat bespreking uitgelok en dit sal interessant wees om te sien wat gebeur.
Op die oog af staan May ‘n skraal kans om te wen, veral omdat hy die stemme van beide die kleiner unies en ‘n paar groter unies sal moet kry om Alexander te onttroon. Alexander het al heelwat kritiek vanuit rugbykringe en die publiek gekry en dis nie ‘n uitgemaakte saak dat May nie verkies sal word nie.
May is uit en uit ’n rugbyman en wat ’n ware liefde vir die spel het. Sy werksvermoë word nie betwyfel na wat hy by die Luiperds vermag het nie.
In Herald se onderhoud met May verlede maand was hy positief en gereed vir die uitdaging: “My verkiesingsveldtog is nie om klein unies te bevorder nie, dit is om rugby terug te neem na die mense toe en Suid-Afrikaanse rugby weer nommer een te maak.”
Die vraag is dus: Sal May nommer een word om SA rugby nommer een te maak?