Volkies se regtervleuel, John-Albert de Leca het met sy drie in die laaste minuut sy o.15A Volkiespan van ‘n klaarblyklike nederlaag tot ‘n roemryke kampioensege gepromoveer.

In ‘n tipiese rugbyeindstryd tussen Volkies en Gimmies het eersgenoemde dit net-net reggekry om hulle teenstanders op die laaste nippertjie met 10-5 te troef.

Dit was heen en weer van die eerste fluitjie af met Volkies wat eerste punte aangeteken het danksy ‘n strafskop. Volkies se voorsprong was wel van korte duur toe Gimmie-slot, Drieckus van Heerden oor die drielyn gaan kuier het met ‘n kragtige lopie. Teen halftyd was die telling 5-3 in die besoekers se guns.

Albei spanne het in die tweede helfte skouer aan die wiel gesit en harde verdediging van albei kante het die telbord tot net voor die eindfluitjie laat stilstaan.

In hierdie spannende Noordwesfinaal het Volkies werklik ‘n haas uit die hoed voor hulle tuisskare getrek en kan nou uitsien na verdere glorie in die komende uitkloprondtes van die Virsekerbeker.