SA Skole netbalkampioenskappe toets Potch skole
By die glansryke SA Hoërskole Netbalkampioenskappe wat vanaf 20-22 Julie by Hoërskool E.G. Jansen in Boksburg gehou is, het die Potchefstroomse verteenwoordigers effens gesukkel teen die sterkste netbalskole in die land. In die o.19-afdeling het Potchefstroom Gimnasium ‘n 11de algehele plek behaal na hulle die eerste twee wedstryde teen Hoërskool Sentraal van Bloemfontein (17-27) en …
By die glansryke SA Hoërskole Netbalkampioenskappe wat vanaf 20-22 Julie by Hoërskool E.G. Jansen in Boksburg gehou is, het die Potchefstroomse verteenwoordigers effens gesukkel teen die sterkste netbalskole in die land.
In die o.19-afdeling het Potchefstroom Gimnasium ‘n 11de algehele plek behaal na hulle die eerste twee wedstryde teen Hoërskool Sentraal van Bloemfontein (17-27) en Hoërskool Zwartkop van Centurion (18-26) verloor het. Gimmies het ook teen Marais Viljoen met 24-30 die knie gebuig voordat hulle Hoërskool Noordkaap met 27-11, Hoërskool Nelspruit met 29-19 en Hillcrest met 29-10 getroef het.
Gimmies kon dit ook nie regkry om Paarl Girls High te klop nie en moes met 27-15 aan die verkeerde kant van die telbord eindig.
Gimmies se o.16A-span het 8ste algeheel in dié toernooi geëindig en ‘n paar goeie oorwinnings behaal. Hulle het Tholokuhle (22-11), Paarl Girls High (14-11), Hoërskool Nico Malan (18-10) en Hoërskool Nelspruit (17-10) geklop. Hulle het ongelukkig teen Zwartkop (7-17), Eldoraigne (10-19) en Hoërskool Oranje (11-15) die onderspit gedelf.
Foto’s: Maritha van Zyl
Hulle het ‘n goeie begin gehad toe hulle die kampioenskappe met twee oorwinnings teen Secunda (17-15) en Framesby (11-10) afgeskop het. Irene Seymore se span het toe naelskraap teen Hoërskool Pietersburg met 13-14 en KHS met 15-18 verloor om algeheel 15de te eindig.
Volkies se ander verteenwoordigers was die o.17A-span wat ‘n 11de algehele plek behaal het. Na ‘n moeilike begin teen ‘n sterk Dinamika span met ‘n 19-7 nederlaag, het Morné Smit se span met oorwinnings teen Paarl Gim (11-9), Goudveld (15-9) en Upington (15-8) gevolg. ‘n Gelykop uitslag teen Oranje Meisieskool (12-12) en nederlae teen Duineveld (6-17) en Ben Vorster (8-14) in ‘n moeilike groep het Volkies se ambisies geknak.
Potchefstroom Girls High se o.19A-span het 24ste geëindig en gewys dat hulle meer as net kanonvoer vir die sterker skole was. ‘n 15-15 gelykop uitslag teen Heuwelkruin en ‘n noue verloor teen Secunda (22-24) was twee van hierdie wedstryde waar hulle maklik twee oorwinnings kon inpalm.
