Met die see op die horison het die Potchefstroomse gholfspeler, Christiaan Burke, die pragtige omgewing van die Mosselbaai Buiteklub as visuele inspirasie gebruik om vanjaar nog ‘n sege in te palm.
Burke, ‘n voormalige leerling van Hoër Volkskool in Potchefstroom, het vanaf 13-15 Augustus die Suidkus Ope titel as deel van die Golf RSA amateurreeks gewen.
Burke het ‘n -11 aangeteken, vyf houe beter as Ivan Williams in die tweede plek met -6. Burke het met tellings van 69,68 en 68 oor die verloop van drie rondtes sy opponente uitoorlê.
“Die wen was vir my awesome, want dit was een van my doelwitte om ‘n amateurtoernooi by die kus te wen. Dit was nie so maklik gewees nie, omdat die weer ‘n rol gespeel het, maar ek is bly ek het bo uitgekom.”
Burke het die afgelope jaar talle titels in die Big Easy Road to IGT sowel as die Bushveld Tour in die Noorde van die land gewen.
“My doelwitte tot die einde van jaar is om nog twee amateur toernooie en so ‘n paar ander professionele toernooie ook te wen,” noem hy.
