‘n Uitblinker by die Riaan Venter Tennisakademie, Mari-Louise van Zyl (16), het onlangs haar eerste Internasionale Tennis Federasie (ITF) titel in Harare, Zimbabwe gewen.
Hierdie tennisspeler wat ook ‘n leerder van Potchefstroom Gimnasium is, het die eindstryd van die J3 Harare-toernooi met 6-2, 6-4, teen Gloria Nahum van Benin gewen.
“Ek het nie verwag dat ek gaan wen nie. Ek wou net my spel verbeter. Ek was baie verbaas om te wen en is ongelooflik bly,” noem sy.
Mari-Louise se pad na die titel het begin met ‘n gemaklike oorwinning teen Zahara El-Zein van Zimbabwe met 6-2, 6-0.
Daarna volg wenne teen Andra Sirbu van Roemenië (6-2 6-1), Sasha Chimedza van Zimbabwe (6-1, 7-5) en Ekua Youri van Botswana (6-3, 6-2).
Mari-Louise het nie een stel in die hele toernooi verloor nie en het bewys dat sy die talent het om top titels te kan verower.
