Volkies se 1ste XV het Saterdag, 15 April, nog ‘n hou in die NWU reeks teen Hugenote gevat.

Diè wedstryde het op Oos-Moot se veld plaas gevind. Hugenote van Springs het die Potchefstromers met 35 – 5 laat les opsê.

Volgens Mighael de Beer, hoofafrigter van Volkies, was sy span se verdediging nie op standaard nie.

“Ons moet maar nog ‘n paar skuiwe maak om die manne in die regte posisies te kry,” het de Beer gesê.

Met die einde van die NWU reeks in sig, sal Volkies hulle spankeuses wil finaliseer voordat die Noordvaal liga begin.

Dit was ‘n moeilike dag vir Volkies met net die o/14A span, (15 – 0) en die Tweedes (15 – 14) wat gewen het.

Die Tweedes het besonderse deursettingsvermoë gewys om uiteindelik die wedstryd met ‘n punt te wen. Dit was ‘n wip-wa wedstryd wat enige kant toe kon gaan. Volkies se 2de XV het die koeler koppe op die dag gehad.

“Ons het nog ‘n lang pad om te gaan, maar die feit dat ons tot die einde toe baklei het, was deurslaggewend gewees,” het Markus de Beer, afrigter van Volkies se 2de XV gesê.