Die Potchefstroomse bergfietsyer, Ernie Roets, is die Afrikakampioen in die junior mansafdeling en gaan nou vanaf 3-13 Augustus in die Wêreldbergfietskampioenskappe in Glasgow, Skotland vir Suid-Afrika verteenwoordig.

Roets het ‘n eerste plek by die Afrikakampioenskappe op 4 Junie by Thaba Trails in Johannesburg behaal.

“Ek het in die wedren ingegaan met ‘n goeie idee hoe ek wil ry. Ek het selfvertroue gehad nadat ek in die eerste rondte weggebreek het,” vertel Roets na sy oorwinning.

Volgens Roets is sy kop reg en is hy in goeie vorm vir die opkomende wêreldkampioenskappe.

“Ek is baie bly en opgewonde om SA te kan verteenwoordig as SA en Afrikakampioen. Ek kan nog punte kry in die volgende paar wedrenne om ‘n beter wegspringposisie te kry by die Wêreldkampioenskappe. Ek sien baie uit na die Wêreldkampioenskappe en ek glo dit gaan goed gaan.”