Volkies se eerste en tweede rugbys-spanne het op 18 Julie, die roes teen Dr. Malan en Hoërskool Sasolburg afgeskud.

Die wedstryde is gespeel ter voorbereiding vir die Noordvaal Bowl afdeling wat komende naweek na ‘n lang vakansie weer hervat word.

Volkies se se 1ste XV het een helfte teen Dr. Malan gespeel en ‘n een helfte teen Sasolburg.

Hulle het albei hulle helftes onderskeidelik, 19-0 en 26-17 gewen.

volgens Johan Herbst, Volkies se 1ste XV afrigter, was dit ‘n suksesvolle dag gewees.

“Dit was goeie voorbereiding en ons is positief vir die naweek wat voorlê,” het hy  gesê. Herbst verduidelik dat die span se verdediging teen veral Dr. Malan goed gegaan het.

“Ons het hulle vir die hele helfte uitgehou, oor die algemeen het dit goed gegaan, ons het goed geskrum en hulle van die doellyn af gehou. Teen Sasolburg was dit ‘n ander prentjie, hulle is groot en fisies met baie goeie agterlyn spelers. Ons het twee keer vinnig gaan druk en toe kom hulle bietjie terug. Ek dink ons 12 seuns wat by provinsiale weke betrokke was het ons baie gehelp. Hulle was net daai bietjie, skerper en fikser as die ouens wat nie op die weke was nie,” het Herbst verduidelik.

Volkies se Noordvaal veldtog sal komende naweek teen Jeugland hervat word. Dit gaan nie ‘n maklike wedstryd wees vir die Potchefstromers, met Jeugland wat verlede jaar nog in ‘n hoër afdeling gespeel het.