Volkies se eerste krieketspan het ‘n oortuigende 7 paaltjie oorwinning (volgens Duckwoth-Lewis) teen Menlopark behaal om momentum in die Finsbury A-liga te behou.
Volkies se boulers was in top vorm die afgelope Saterdag (31 Januarie) en het die besoekers van Pretoria vir slegs 167 uitgeboul. Hier was Zander Nel met 4/20 en Olefa Padi 3/42 uitblinkers vir die tuisspan.
Andries Venter (48 van 60 balle) het ‘n hele paar indrukwekkende dryfhoue gespeel wat Menlopark se boulers laat kopkrap het. AW van der Merwe het bestendige 24 (47) aangeteken voor hy uiteindelik sy paaltjie verloor het. Van der Merwe is twee keer misgevang en kon ook eenkeer uitgehardloop word as die bouler nie die gooi van die grens af misgevang het nie.
Weerlig het die wedstryd vroëer laat stop met die telling op 85/3 na 21 boulbeurte.
Volkies se tweede span het die vorige dag vir Menlo se tweedes ook met 7 paaltjies geklop.
Hier maak Sihle Duma (50* van 76 balle) en Juan van Niekerk (34* van 34 balle) om hul span na ‘n gemaklike oorwinning te neem.
Menlopark is vir 128 uitgeboul met Elzer Behrens (4/39) en Martin Koch (3/24) wat die meeste skade aanrig.
Menlopark se o/15’s kry wel die oorhand teen Volkies se o/15A’s in Pretoria. Volkies is vir 97 in 35 beurte uitgeboul. Menlo slaan die wenlopies in 18 boulbeurte en wen met 7 paaltjies.
