Groot veldbrande het vandag in die omgewing van die JB Marks Waterwerke en by Dagbreek Estate uitgebreek, wat danksy die spoedige werk van die Potchefstroom Brandbeskermingsvereniging geblus is.

Die tydsberekening van die Bell 407-helikopter kon nie beter gewees het nie. Hierdie helikopter het op Sondag, 9 Augustus, in Potchefstroom gearriveer om tydens die brandseisoen te help. Die emmer kan tot 450 liter water per slag hou, iets wat vandag baie handig te pas gekom het.

“Ons moes weer die helikopter teen ons koste aktiveer, anders het die dorp nie water gehad nie en sou die geboue en kraginstallasie gebrand het. Alles is nou egter geblus,” het dr. Kobus Roux, voorsitter van die Potchefstroom Brandbeskermingsvereniging, genoem.