Mary-Jane Schwartz het na vore gekom om te deel wie haar pa werklik was – nie net Randfontein se held nie, maar ook ’n geliefde pa en mens.

Oom Piet (Piet Lottering) het sedert 29 Augustus behandeling in ’n Johannesburgse hospitaal ontvang. Sy dogter, Mary-Jane, het destyds vertel dat hy gevoel in een been verloor het en op 31 Augustus geopereer is. Hy is op 7 Oktober, op die ouderdom van 67, aan kardiovaskulêre oorsake oorlede.

Hierdie nuus het swaar op die gemeenskap geval – en selfs meer op sy dogter, wat haar hartseer met die Randfontein Herald gedeel het.

• Lees ook: Randfontein rou oor geliefde slaggate-held, Oom Piet

Mary-Jane beskryf haar pa as hardwerkend, nederig, selfbeslote en doelgerig.

“Wanneer jy na my pa se agtergrond kyk, sal jy sien hy het dit nooit maklik gehad nie,” het sy gesê.

Sy lewe het moeiliker geword toe hy in 2019 sy ma en broer, Frans, verloor het. ’n Jaar later is sy ander broer, Willem, oorlede. In 2020 het sy dogter, Marthie, ook aan leukemie gesterf. Kort daarna het Mary-Jane vir haar pa vertel dat sy weer deur ’n slegte slaggat gery het.

“My sussie het ook daaroor gekla voor haar afsterwe. My pa het vir my gesê ek moet nie daaroor bekommer nie. Dit was hierna wat hy sy reis begin het,” het sy verduidelik.

Mary-Jane sê dit was vir haar pa belangrik om sy gemeenskap te dien. Sy is trots dat hy die beeld van samewerking in Randfontein versterk het. “Hy het altyd probeer om dinge beter te maak,” vertel sy.

• Lees ook: Beloved pothole fixer Oom Piet recovers after surgery

Wanneer sy aan haar pa dink, is daar een woord wat by haar opkom – held.

“Voor ek getroud is, was my pa my alles. Ek het nooit gedink hy gaan siek word of dat ek hom sou verloor nie. Hy was my held, en ek het gehoop hy sou ons nie vinnig verlaat nie,” sê sy met trane.

Sy onthou hom as ’n goeie pa met ’n sagte hart vir kinders en ouer mense. Alhoewel hy nie iemand was wat maklik emosies wys nie, het hy sterk probeer wees vir sy geliefdes.

“Hy was streng vir die regte redes en het nooit doekies omgedraai nie,” vertel sy.

As daar een les is wat sy by hom geleer het, sê Mary-Jane, is dit om haar geliefdes naby te hou – en haar vyande nog nader. Haar pa het altyd seker gemaak sy is voorbereid teen enige iemand wat haar wou benadeel.

• Lees ook: Held van die pad: Oom Piet binnekort reg vir slaggate ná tref-en-trap

Nou, sê sy, sal sy elke dag na die paaie kyk en aan hom dink. Sy verlang daarna om hom weer by sy hardewarewinkel te sien en om daardie bekende woorde te hoor: ‘Lief vir jou, my meisiekind’.

“Sy nalatenskap is groot, maar dit was nie net die regmaak van die slaggate wat hom besonders gemaak het nie,” sê sy. “Sy geloof het hom laat uitstaan. Hy het geglo dat niks in die lewe verniet is nie en dat alles sy prys het – behalwe sy siel.”

Mary-Jane vertel dat haar pa tydens sy hospitaalverblyf hard geveg het om aan te hou leef.

• Lees ook: Oom Piet en span al weer ‘op ‘n rol’

“Tot op die laaste het hy nog gedink aan wat hy vir die dorp kan doen,” sê sy.

“As ek nog iets vir my pa kon sê, sou ek hom vertel het hoe lief ek hom het en hom bedank vir al sy harde werk om die dorp weer tot lewe te bring. Hy mag dalk nie meer hier wees nie, maar hy sal nooit vergeet word nie,” het sy afgesluit.