POLOKWANE – Werner Coetzee (18) het sy skoolloopbaan by Klein Ondeug Kleuterskool begin en het daarna by Laerskool Piet Hugo ingeskryf om sy laerskool loopbaan te voltooi.
“Ek het my skoolloopbaan aan die Hoër Tegniese skool Tom Naudé voltooi met wiskunde, wetenskap, Afrikaans, Engels, siviele tegnologie, lewensoriëntering en ingeneursgrafika en ontwerp (IGO) as vakke. My gunsteling vakke was verseker wiskunde en Afrikaans omdat die onderwysers dit interessant gemaak het,” het hy aan Review vertel.
Werner het onder die top tien akademiese presteerders van Tom Naudé gematrikuleer.
Werner het vertel dat hy as klein seuntjie ‘n wildbewaarder wou word, maar dat hy nou ‘n kursus in siviele ingenieurswese gaan voltooi aan die Universiteit van Pretoria.
“Daar was goeie balans tussen my studies, sport en sosiale lewe. Dit was vir my belangrik om aan alles deel te neem sodat ek kon leer hoe om onder druk te werk. Ek het aan rugby, gholf, atletiek en krieket deelgeneem,” het hy gesê.
Werner het ook verlede jaar aan die jaarlikse Beeld Ekspo deelgeneem waar hy as nasionale wenner uit die stryd getree het. “Dit is be-langrik om aan soveel dinge moontlik deel te neem, anders het jy tyd om droog te maak. Jou brein moet besig bly anders raak jy lui.”
Hy het vertel dat hy nie regtig ‘n rolmodel gehad het nie.
“Ek het myself maar net gedruk tot my uiterste. Ek weet ek kon meer doen, maar op skoolvlak was daar net ‘n handjievol goed wat ek kon doen.”
Sy ma en sy tannie is volgens hom verseker die mense wat hom deur alles bygestaan het. “Hulle motiveer my so baie om te presteer en ek is baie dankbaar dat hulle in my lewe is.
Hulle is baie goed vir my en ek waardeer alles wat hulle vir my doen.”
Oor vyf jaar wil Werner ‘n gekwalifiseerde ingenieur wees met ‘n belowende toekoms in die ingenieursveld.
