Osie-teddies Kleinkindontwikkelingsentrum se kleuters het onlangs hul jaarlikse Ouma- en Oupadag in Laerskool Pietersburg-Oos se skoolsaal aangebied.
Die kleuters het hul oumas en oupas se harte laat smelt met opvoerings van gedigte en liedjies wat hulle liefde vir hul grootouers uitgebeeld het.
Die eregaste, die oumas en oupas, het ook heerlike eet- en drinkgoed geniet onder die groot skadubome in Oosskool se vierkant buite die saal, wat pragtig versier was in skakerings van pers en wit vir die dag.
Elize van Schalkwyk, een van die oumagrootjies wat die dag bygewoon het, het gesê dat dit vir haar wonderlik was om te sien hoeveel die kinders reeds weet teen so ‘n jong ouderdom en het met baie lof van die Teddies se onderwysers gepraat.
“So 80 jaar gelede was dit ‘n heel ander storie,” het sy met ‘n glimlag vertel.
Die kleuters het ook vir hul oumas en oupas geskenke gemaak op hierdie spesiale dag en hulle bederf met unieke skilderye en en handgeverfde borde.
