POLOKWANE – Oosskool se o/13-gholfspan het tydens die skoolvakansie herinneringe vir ‘n leeftyd geskep toe hulle die Super 12-gholftoernooi op die wêreldbekende Gary Player Gholfbaan by Sun City gewen het.

Die span, bestaande uit Zach Allison, Nathan Faver, NJ Pretorius en Liano Viviers, het saam met 110 ander spelers van 23 skole landwyd meegeding.

Oosskool het uiteindelik as wenners van die IPS-puntekompetisie uit die stryd getree – ‘n formaat waarin spelers op hul eie voorgee speel.

Een van die vele hoogtepunte van die toernooi was toe die jong Zach, tans in gr. 5, die eerste plek in die IPS-kategorie behaal het.

“Ek het dit glad nie verwag nie, dit was ‘n groot verrassing. My voorgee is baie hoog en dit het my gehelp om makliker punte aan te teken,” het hy vertel.

In die Zero-kompetisie het Oosskool 12de geëindig, maar in die Limpopo-liga (ook ’n Zero-formaat) het die A-span eerste geëindig in die seuns A-afdeling, die B-span tweede in die B-afdeling, en die meisiespan het ’n indrukwekkende vierde plek behaal – in hul heel eerste deelname.

Gholfafrigter by Oosskool, Heinrich Schoeman vertel dat uit die A-span, slegs een speler in gr. 7 is, wat die toekoms nog meer belowend laat lyk vir die Osies.

Wat dié sukses egter groot betekenis gee, is die hegte pa-en-seun-betrokkenheid. Al vier seuns se pa’s is self bedrewe gholfspelers en ondersteun hul seuns op én van die gholfbaan af.

“Dit is ‘n groot voorreg om saam met jou seun gholf te speel. Dis ‘n regte pa-en-seun ding,” vertel Nathan se pa, Ernest.

Hy noem verder dat hulle probeer om te minste een keer per week saam gholf te speel.

“Ek glo harde werk is die resep vir enige sukses. Gholf is nie hierdie kinders se enigste of hulle hoofsport nie, hulle speel ook rugby, hokkie, krieket en tennis, wat hierdie prestasies nog meer merkwaardig maak.”

NJ se pa, Jacques, beaam dat gholf ‘n wonderlike geleentheid bied vir bande bou tussen pa en seun.

“Ons gesels lekker op die baan en hy leer sommer baie lewenslesse op die baan ook. Ons speel veral gereeld aan die einde van die jaar saam, wanneer dinge minder besig is.”

Hy vertel dat die onderwysers se passie beslis bydra tot die seuns se entoesiasme vir dié sport. Liano se pa, ook Liano, sê hy sien uit na elke oefensessie saam met sy seun.

“Sy passie vir die spel, die oefeninge en die vriendskappe wat hy op verskillende bane vorm, is sy resep vir sukses.”

Theo, Zach se pa, sê hy is besonder trots op sy seun se prestasie en probeer gereeld saam met Zach en sy broer, Morgan, speel.

“Die tyd saam is vir my kosbaar.”

Jacques wys ook uit dat die Gary Player-baan een van die vyf moeilikste in die land is.

“Die seuns moes self hul stokke dra en kon nie ‘n baljoggie hê nie. Ons as ouers moes ook op ‘n afstand bly en kon nie raad gee nie. Dit maak hul prestasie net soveel meer indrukwekkend.”

Kort op die hakke van Sun City het die A-span hierdie onlangse naweek weereens hul dominansie bewys deur die Limpopo Interlaer Gholfkompetisie by Koro Creek met 28 punte te wen.

Die B-span, wat bestaan uit Sion Vogel, Ryan O’Reilly, Willem de Lange en Jano Olivier, het tweede geëindig met 17 punte, en die meisiespan – Danielle Fouché en Ashley Sibley – het vierde geëindig met agt punte.

“Ons as skool is ongelooflik trots op elke speler,” vertel Schoeman.

“Hulle werk hard, wys karakter en verdien elke bietjie van die sukses wat hulle behaal.”