Kruiner mik vir goud by WMG
Leané dring deur na die Global Finals wat op November, 26 sal plaasvind. Daar sal sy teen lande soos Australië, Pakistan, Engeland, Verenigde Arabiese Emirate, Ierland en vele ander deelneem.
Leané Nortje, ‘n graad 7-leerder van Laerskool Helderkruin het vanjaar nuwe hoogtes bereik toe sy vir ‘n derde keer aan die World Monologue Games (WMG) deelgeneem het.
Die WMG is die grootste waarnemende vertoonvenster in die wêreld met kunstenaars van meer as 100 lande wat deelneem.
Die talentvolle jong kunstenaar het einde Oktober aan die WMG streeksfinaal deelgeneem waar sy ‘n eerste plek verower het. Volgens Leané het sy teen ander Suid-Afrikaners, sowel as Kanadese deelnemers meegeding in die Youth Category (deelnemers tussen die ouderdomme van 12-18 jaar).
Sy dring dus deur na die Global Finals wat op November, 26 sal plaasvind. Daar sal Leané haar land verteenwoordig teen lande soos Australië, Pakistan, Engeland, Verenigde Arabiese Emirate, Ierland en vele ander.
“Ek was opgewonde toe my naam by die streeksfinaal uitgeroep is,” het Leané vertel.
“Ek kan nou saam met die wêreld se beste akteurs by die Globals optree en probeer om ‘n brons-, silwer- of goue medalje vir Suid-Afrika te wen. Ek kan eenvoudig net nie wag nie!”
Beroepslui in die bedryf van regoor die wêreld, insluitend bekende akteurs, filmregisseurs en hoofde van internasionale toneelskole, het ingeweeg om te kies watter kunstenaars deurgedring het na die Finals-reeks.
WMG stigter, Pete Malicki is verheug om te sien dat die spele elke jaar groter en beter word.
“Wat ek die meeste van die spele hou, is om te sien hoe ongelooflike kunstenaars van regoor die wêreld bymekaar kom,” het hy vertel.
“Meer as die helfte van die wêreld se lande het deelgeneem, hoewel ek nie heeltemal tevrede sal voel totdat ons ons eerste voorlegging van Antarktika kry nie!”
Die spele het gesien hoe duisende kunstenaars registreer sedert die ontstaan daarvan tydens die 2020-inperkings. Leané is een van slegs 90 mededingers oor ses kategorieë wat ‘n plek in die Global Finals verseker het.
“Die monoloog wat ek uitvoer gaan oor ‘n motorkaping wat voor my oë ontstaan het. Om op die wêreldverhoog mee te ding is ’n droom wat waar geword het en ek is baie opgewonde om my werk te deel!” het Leané vertel.
Die Global Finals sal regstreeks uitgesaai word en kan ondersteuners op 26 November na Leané se monoloog in die Jeugkategorie kyk. Vind meer uit oor dié gesogte geleentheid hier: worldmonologuegames.com/watch.
