Terug skool toe, welkom by die nuwe normaal

VANDERBIJLPARK. – Indien daar enige twyfel in ouers se gemoed was om hulle kinders terug skool toe te stuur, kan die ouers van die Laerskool Eligwa vannaand rustig slaap. Die skool is skoon, veilig en slaggereed om voort te gaan.

Die skool het vandag sy Gr.7-leerlinge terug verwelkom na nege weke se afwesigheid weens die wêreldwye uitbreek van Covid-19. Hoewel die kindergesiggies aanvanklik verward en bekommerd gelyk het, het dit later soos mis voor die son verdwyn. Volgens mnr. Benni Boshoff, hoof van die skool, is daar besluit om ‘n orienteringsessie te hou voordat die akademiese jaar Maandag amptelik hervat word. Die Gr.7’s se temperatuur is met hul aankoms deur personeel gemeet en hulle hande is gesanitiseer, voordat hulle in die skoolsaal deur mnr. Boshoff toegespreek is.

Hoewel die leerlinge grootoog gesit en rondkyk het, het die atmosfeer vinnig verander. Tussendeur al die reëls en regulasies was daar ook tyd om te lag. Sosiale afstand is die nuwe norm, maar soos enigiets sal dit ‘n rukkie neem om daaraan gewoond te raak. Welkom by die normaal.