Local newsNewsNews
Mej. Vaal inspireer ander om hul drome te volg
VEREENIGING. – Franzé Janse van Rensburg (21) is onlangs as Mej Vaal 2020/2021 aangewys.
Tussen funksies en eksamens gaan dit dol, maar sy hanteer alles met kalm grasie. Dié mooie jonge dame studeer veeartsenykunde. Sy het so pas die moeilike derde jaar van die ses jaar kursus agter die rug. “Dit was nogal ‘n uitdaging toe Covid-19 toeslaan en ons skielik nie meer kontakklasse kon hê nie,” vertel sy. Gelukkig is sy baie detail georiënteerd en presies in alles wat sy aanpak.
Om veearts te word was nog altyd haar droom. Deur die jare het sy al heelwat ondervinding op hul kleinhoewe buite Henley- on-Klip opgedoen. “Ek het al ‘n skaap met ‘n moeilike geboorte gehelp deur die lammetjie uit te trek. Ek gee glad nie om om my hande vuil te maak nie, solank ek kan goed lyk terwyl ek dit doen,” lag sy. Franzé is lief vir diere en het onder meer ‘n kat wat haar soos ‘n skaduwee volg. Haar hart se punt is Divine, haar skouperd.
“Ek het perdrylesse begin neem toe ek 12 jaar oud was. My pa het eers gesê ek mag lesse neem, maar hy gaan nie ‘n perd koop nie. Wel, vandag het hy ‘n perdestoet en doen ons die skoue saam,” lag sy. Sy oorweeg dit om later in die behandeling van perde te spesialiseer.
Franzé se leuse is: “Keep going, you never know who you may be inspiring.” Juis daarom wil sy ‘n verskil in meisies se lewens maak. “Daar is te veel meisies wat dink hulle moet ‘perfek’ wees of wat probeer om soos iemand anders te wees. Vir hulle wil ek sê, jy hoef nie perfek te wees nie. Wees net jouself. Jy is goed genoeg!” Franzé se gesin en vriende ondersteun haar in alles wat sy aanpak.
“By die kroningsaand het my ma-hulle gesit waar ek hulle kon sien. My stiefpa het begin huil toe hulle aankondig dat ek gewen het. My sussie Mari doen haar doktoraal in Duitsland en sy het laat weet dat sy aanlyn kyk. My vriende het die hele tyd video’s geneem en dit vir my tydens die geleentheid ge-WhatsApp. My pa in die Wes-Kaap maak seker hy kry al die artikels en foto’s,” vertel sy met blink oë.
Ten spyte van min slaap weens die eksamens, geniet sy die funksies en die projekte. Eersdaags is dit vakansie en dan het sy drie maande waar sy haar op gemeenskapsdiens en haar amptelike funksies as Mej. Vaal gaan toespits.
* Lesers kan haar Facebookblad, “Franzé Janse van Rensburg – Miss Vaal 2020/21” volg waar daar gereeld foto’s en video’s van haar en die ander titelhouers se doen en late geplaas word.
At Caxton, we employ humans to generate daily fresh news, not AI intervention. Happy reading!
