Ouma Lillian is sowat twee jaar ‘n inwoner by die tehuis. “Sy is die oudste oumatjie waarna ek nog moes omsien,” sê Natasha van der Merwe van Hibiscus.

Ouma Lillian is half blind en half doof, maar  kan nog loop. Sy het ook reeds verskeie operasies in haar lewe agter die blad, maar sy het telkens goed herstel. Ouma Lillian is baie lief vir honde (haar hond se naam is Stormy), asook vir eet en sy geniet haar tee.

Natasha het al voorheen probeer om meer oor ouma Lillian se lewenstog uit te vind, maar kon nie baie inligting by die familie kry nie. Daar is wel uitgevind dat ouma Lillian in die Kaap gebore is en ook daar haar skoolloopbaan voltooi het.

Sy het na skool liefde gevind en was in die eg verbind, maar haar man is vermoedelik op jong ouderdom aan longontsteking oorlede. Sy was gelukkig om weer liefde te vind.

Sy is weer getroud en die egpaar het hulle in die destydse Natal gevestig tydens die oorlog. Na die oorlog het die Kaap geroep en die egpaar het soontoe getrek. Daar het sy in ‘n bakkery gewerk. Die egpaar het ‘n seun gehad.

Daar is beslis baie meer wat mens graag oor ouma Lillian sal wil weet, maar dit is ongelukkig waar die inligting opdroog.