Peacehaven: Inwoners nou al twee weke sonder krag
Dit is vandag (Donderdag 8 April) 'n volle twee weke sedert Peacehaven sonder krag gelaat is.
VEREENIGING. – Die buurt is op 26 Maart in donkerte gedompel weens ‘n kragonderbreking.
Die kragprobleme is vererger toe ‘n transformator op 29 Maart by ‘n substasie ontplof en ‘n brand skade aangerig het.
Die situasie het tot protesoptrede gelei waartydens inwoners besige paaie soos Generaal Hertzogweg en Golfweg met brandende bande, takke, klippe en glasskerwe versper het.
Dit het ook tot verkeersopeenhopings in Vereeniging gelei namate inwoners gedwing is om Houtkopweg te gebruik.
Die Emfuleni Plaaslike Munisipaliteit kon nog nie sê presies wanneer die kragtoevoer herstel sal word nie.
Volgens die laaste amptelike verklaring wat deur die munisipaliteit se kommunikasieafdeling uigereik is was hulle besig om die omvang van die skade te bepaal.
Intussen is inwoners se Paasnaweek, sowel as hul kos, bederf.
Oues en gestremdes se mediese toestelle kan nie sonder elektrisiteit werk nie.
Dit het glo ook tot verswakte selfoonopvangs gelei en talle inwoners kan nie ‘n inkomste sonder elektrisiteit genereer nie.
