VAALPARK. – Normaalweg moet mens nie tussen ‘n Suid-Afrikaner en sy bakkie kom nie, maar gelukkig vir twee onnutsige matrikulante van die Hoërskool Vaalpark het hul skoolhoof, Etienne Engelbrecht ‘n sin vir humor.

Die twee het so ewe op Vrydag, 9 April 2021, die hoof se bakkie van hoek tot kant toegedraai in kleefplastiek. Daar was selfs ‘n nota by. Dit het gelui: “Manneer (sic)  moet ‘n lekker naweek hê van Jayden Fourie + RCL. HA HA HA”.

Etienne het maar net geglimlag en so ewe saam met die twee gestaan vir ‘n foto. Hopelik het hulle gehelp om weer van die klewerigheid ontslae te raak!

Die petalje is op die skool se facebookblad gedeel onder die opskrif: “Een van die oulikste Matriekgroepe ooit! Matrix 2021 you rock!”