KYK: Toestand van Vosloopark en omliggende gebiede skok
Morsjorse, rommelstrooiers en plakkers het Vosloopark en die veld langs Deerylaan in 'n haglike toestand gelaat.
VEREENIGING. – Tydens Vaalweekblad se mees onlangse besoek is ons begroet deur hope rommel wat deur parkgangers in die park gestrooi is.
Dit volg nadat sakelui en vrywilligers onlangs ure van hul tyd opgeoffer het en baie geld spandeer het om Vosloopark in Drie Riviere mooi te maak deur rommel op te tel en gras te snoei.
Inwoners kla ook oor ‘n groeiende plakkerskolonie wat hulself langs die oewers van die Kliprivier gevestig het.
Die probleem is al herhaaldelik aan die Emfuleni Plaaslike Munisipaliteit gekommunikeer maar niks word glo gedoen nie.
Die munisipaliteit het in Augustus vanjaar heelwat plakkers uit die park verwyder maar dit was nie lank voor hulle almal terug was nie.
“Dit is net ‘n kwessie van tyd voor hier ‘n plakkerskamp opspring,” het meen ‘n bekommerde inwoner.
Ook die gebied langs Dee Drive het oor die afgelope paar maande in ‘n onwettige stortingsterrein, soortgelyk aan Spider Valley, ontaard waar mense huishoudelike rommel en selfs dooie diere se verottende karkaste strooi.
