VEREENIGING. – Volgens rdl. Daleen Venter, wyksraadslid vir Drie Riviere, is dit moontlik vir wyk 1 van die Emfuleni Plaaslike Munisipaliteit om oor te gaan na die naburige Midvaal Plaaslike Munisipaliteit, maar dan benodig hulle 75% van inwoners se steun. Volgens die laaste sensusopname is die bevolking van die wyk 9249, maar die getal mense wat in die wyk bly kan volgens Venter dalk nader aan 15 000 wees.

Venter en rdl. Salome Janse van Rensburg, raadslid vir Risiville, begin hierdie week met ’n opname om inwoners se gevoel hieroor te toets.

Die Emfuleni Plaaslike Munispaliteit is onlangs deur die graderingsagentskap Ratings Afrika as die swakste munisipaliteit in Gauteng aangewys met ’n telling van net 21, teenoor die Midvaal Plaaslike Munisipaliteit, wat ’n telling van 77 persent gekry het.

‘n Onlangse kragonderbreking wat 32 dae geduur het, alewige probleme met krag en waterdruk en ’n algehele gebrek aan dienslewering is volgens Venter van die faktore wat daartoe gelei het dat inwoners nou met alle mag en mening wil oorskuif.

Janse van Rensburg sê inwoners van Drie Riviere, Drie Riviere-Oos en Drie Riviere Proper het genoeg gehad van die Emfuleni Plaaslike Munisipaliteit onder ANC-leierskap.

“Die behoefte van inwoners om die buurt van Drie Riviere te probeer red deur oor te skuif na die Midvaal Plaaslike Munisipaliteit neem vinnig toe namate eiendomswaarde teen ’n onrusbarende tempo verlaag en die stand van die buurt vinnig agteruitgaan.

“Die eens pragtige buurt van Drie Riviere het nou so baie slaggate dat wanneer jy die een probeer mis, jy in ’n ander een vasry. Die straatligte werk nie en miljoene liter water gaan elke dag verlore weens waterlekke wat nie reggemaak word nie.

  “Riool stoot in tuine op en daar is eenvoudig te veel probleme om op te noem,” vertel Janse van Rensburg.

Volgens ’n bekende eiendomsagent van die Vaaldriehoek met wie Vaalweekblad verlede week gesels het is een van die eerste vrae wat voornemende huiskopers vra wie in bewind is van die buurt en of dit ’n DA of ANC area is.

Volgens Venter en Janse van Rensburg gaan hulle hierdie poging om los te breek van die Emfuleni Plaaslike Munisipaliteit met alle mag en mening dryf.

“Dit gaan nie oornag probeer nie. Dit is ’n langtermyn proses en vir dit om te gebeur benodig ons die steun van inwoners. Daar mag ook teenkanting wees,” sê Janse van Rensburg.  

Venter en Janse van Rensburg sal Saterdag vanaf 08:30 by River Square wees (tussen Pick n Pay en Woolworths) waar inwoners ’n petisie kan teken.

Inwoners wat meer hieroor wil uitvind kan Venter (raadslid vir Drie Riviere in die Emfuleni Plaaslike Munisipaliteit) by 082 331 8111 of Janse van Rensburg (raadslid vir Risiville in die Midvaal Plaaslike Munisipaliteit) by 082 212 4520 skakel.