VEREENIGING. – ‘n Munisipaliteit is vir die instandhouding van sy paaie verantwoordelik maar tamaai slaggate in besige strate soos Mario Milanirylaan en Golfweg word eenvoudig nie reggemaak nie en rig daagliks skade aan motoriste se bande aan.

Was dit nie nie vir plaaslike sakelui wat nou en dan help om paaie reg te maak nie sou dit waarskynlik veel erger gelyk het.

Vaalweekblad se verslaggewer moes Dinsdagoggend alleen twee bande vervang weens twee afsonderlike slaggate – die een in Mario Milaniweg en die ander in Golfweg. 

Mokete Montshi, ’n werknemer van Star Nissan Vereeniging, het tydens die eerste geleentheid gestop en gehelp om die linker voorwiel met ‘n spaarwiel te ruil.

Daar was ook heelwat motoriste langs die pad wat deur dieselfde slaggate gery het.

Juandre Heyneke, ’n motoris wat Dinsdagoggend ‘n band moes vervang nadat hy ook deur die yslike slaggat in Mario Milaniweg gery het meen hy gaan beslis eis.

Intussen word inwoners aangemoedig om tot organisasies soos Proudly Three Rivers en Vaal Business Cooperation by te dra wat gereeld die moeite doen om slaggate toe te stop en paaie in stand te hou waar die Emfuleni Plaaslike Munisipaliteit inwoners in die steek laat.