VANDERBIJPARK. – Vandag, 13 Mei, vier Christene wêreldwyd Hemelvaartdag. By die Vaal Triangle Academy (VTA) het die personeel en leerlinge die dag op ‘n besonderse wyse gevier. Die hele skool het om 10:00 op die oop veld naby die skool byeengekom.

Onder een boom was ‘n kruis wat aanmekaar gesit is deur prente wat die juniors ingekleur het. Die leerlinge het ook prentjies van onder andere wit duiwe waarop ‘n Bybelvers gedruk was vasgehou.

Nadat die skoolhoof, Caren Oosthuizen, almal weer aan die betekenis van die dag herinner het, het Boesman Swanepoel 10 wit duiwe losgelaat. Die duiwe het hoog in die lug gevlieg, alvorens hul koers huis toe gekies het.

Elke klas het daarna ook ‘n pers ballon losgelaat met ‘n Bybelversie in. Caren sê op ‘n vorige keer het ‘n boer hulle gekontak nadat een die ballonne se Bybelversies op sy plaas beland het. “Hy was baie depressief daardie dag en die boodskap het hom so bemoedig, dat hy ons gekontak het om dankie te sê.”

Die oggend se verrigtinge is afgesluit met lofprysing, ‘n gebed en die saamsing van die Onse Vader.