Die Midvaal Plaaslike Munisipaliteit se burgemeesterskomiteelid vir ontwikkeling en beplanning, rdl. Lynda Parsonson sê hoewel inwoners ’n demokratiese reg het om protes aan te teken, dit vreedsaam moet geskied sonder om op ander mense se demokratiese regte inbreuk te maak.

“Die munisipaliteit verstaan die protesoptrede gaan oor behuising en die gebrek aan dienste.

Midvaal het reeds proaktiewe stappe geneem, ondersoek ingestel en studies gedoen sodat inwoners van Piels Farm, Boitumelo en Khayelitsha met grond voorsien kan word wat behoorlike behuising en toegang tot water, riolering en elektrisiteit bied.

“Lewensvatbaarheidstudies is reeds gedoen en grond is reeds geoormerk vir ontwikkeling. Ongelukkig kan behuising nie op plaaslike regeringsvlak voorsien word nie,” sê Parsonson.

Parsonson het gevra dat die gemeenskap die onwettige en gewelddadige protesoptrede staak.

Sy meen die munisipaliteit doen sy bes om die kwessie so spoedig as moontlik op te los.

Volgens Parsonson is die munisipaliteit tans in samesprekings met inwoners om ‘n volhoubare oplossing te probeer vind.