VANDERBIJLPARK. – Die Hoërskool Transvalia het onlangs geskiedenis gemaak toe hy vir die vyfde agtereenvolgende jaar die Vaaldriehoek se Hoërskole-gholfliga gewen het. Was dit nie vir die Covid-19 grendeltydperk in 2020 nie, kon dit dalk ses jaar in ‘n ry gewees het.
Valia het met 136 punte voor hul naaste teenstander, die Hoërskool Dr Malan geëindig, met die Hoërskool Overvaal in die derde plek. Valia kwalifiseer sodoende vir die vyfde jaar in ‘n ry vir die finaal van die Noordvaaltoernooi asook vir die uitspele teen die Johannesburgse wenners om te bepaal watter skool Gauteng-Suid by die SA Hoërskoletoernooi in Port Elizabeth gaan verteenwoordig.
Valia se goeie vorm was reeds duidelik sigbaar gedurende die jaarlikse NWU Super-16 toernooi op Koro Creek waar hy ’n skaflike tweede plek behaal het naas die Hoërskool Menlopark van Pretoria teen wie hulle met 2 punte verloor het. Aiden Leeb verdien ‘n klop op die skouer nadat hy as nommer 1-hoërskolespeler in die Vaaldriehoek geëindig het.
Hy, tesame met Henre Proctor (2de), Martin Papworth (3de), Damian Araujo (4de) en Wihandre Kruger (7de) het die Vaaldriehoekse hoërskole A-span gehaal, terwyl Anton van Dam (10de) asook Christopher Smith (12de) die Vaaldriehoekse hoërskole B-span gehaal het. Hierdie spelers gaan die Vaaldriehoek by die Suid-Afrikaanse Provinsiale Skolekampioenskap in September vanjaar op die Heron Banks Gholfbaan verteenwoordig.
Daar bestaan weens die Covid-19 pandemie nog onsekerheid of en wanneer die kampioenskap gaan plaasvind.