Ter wille van ons erfenis
Vaalpark Primêre Skool doen hul deel om 'n volhoubare toekoms te verseker deur plastiek te herwin. Hulle daag ander skole uit om dieselfde te doen.
Vaalpark Primêre Skool het weereens bewys waarom hulle uitstaan as ‘n omgewingsvriendelike skool waar diensbaarheid ‘n prioriteit is.
Op Donderdag, 23 September 2021 kon almal as deel van Erfenisdag vieringe, met gewone klere skool te gaan.
Die enigste voorwaarde was dat elke leerder ten minste twee leë plastiekhouers moes saambring.
Al die plastiek is bymekaar gemaak in herwinningsakke wat Safripol by die skool kom afgee het.
Hulle het later ook weer die vol sakke met herwinbare plastiek kom haal.
Die skool se skakelbeampte, Charmaine Kriek sê: “September is opruimingsmaand en Vaalpark Primêre Skool wil die gewoonte by ons kinders kweek om na hul omgewing om te sien. Hiermee maak hul ‘n verskil in ons land en sy omgewing.”
Sy het bygevoeg dat die skool se personeel en leerlinge beoog om op Saterdagoggend, 16 Oktober ‘n massa opruimingsveldtog in Vaalpark te loods ten einde ‘n skoner dorp te hê waarop almal trots kan wees.
Die skool nooi al die ouers van Vaalpark Primêre Skool en ander gemeenskapslede uit om saam met hulle ‘n verskil in die gemeenskap te maak.
