Die polisie het Donderdag omstreeks 18:15 op die moordtoneel in Markstraat opgedaag. Daar is op die liggame van Johannes van Vuuren (80) en Dorothia van Staden (58) afgekom, nadat Van Staden se man verskeie kere probeer het om haar te kontak en later ‘n familielid gevra het om te gaan kyk wat aangaan.

Van Vuuren is in die binnehof aangetref met veelvuldige meswonde en Van Staden is in die motorhuis gevind met veelvuldige hoof- en lyf-beserings.

Die huis in Markstraat was geplunder en onder die gesteelde items was ‘n rekenaar en televisies.

Die verdagtes in die dubbele moord is later dieselfde aand deur die Honde Eenheid en Blitspatrollie van die Gqeberha (Port Elizabeth) in hegtenis geneem.

Mnr. Van Staden se stiefdogter (36) en haar man (34), asook hul 10-dogtertjie wat ten tyde van die moord by die Van Stadens woonagtig was, het intussen spoorloos verdwyn. 

Daar is dadelik ‘n kennisgewing uitgestuur met hul motor (‘n goue 3-reeks BMW) se registrasienommer. Omstreeks 21:00 Donderdagaand het lede van die Gqeberha Honde Eenheid en Blitspatrollie inligting oor die motor ontvang.

Die motor is naby die N2 naby Coega opgemerk. Die polisielede het hulle agtervolg, afgetrek en in hegtenis geneem. Daar word vermoed dat hulle onderweg was na Kariega (Uitenhage).

Die 10-jarige dogtertjie is na ‘n plek van veilige bewaring geneem. Die egpaar sal waarskynlik op Maandag, 27 September in die Heilbron Hof verskyn.